ಸಿಂದಗಿ ತಾಲೂಕಿನ ಗೋಲಗೇರಿ ಅಂದಾಜು 800 ವರ್ಷಗಳ ಪೌರಾಣಿಕ ಇತಿಹಾಸ ಹೊಂದಿದ ಗ್ರಾಮ. ಹಿಂದೆ ಲಿಂಗಯ್ಯನಪುರ ಎಂದು ಕರೆಯಲಾಗುತ್ತಿದ್ದ ಈ ಗ್ರಾಮದ ಪಕ್ಕದ ಢವಳಾರ ಗ್ರಾಮದಲ್ಲಿ ಕುರುಬ ಸಮಾಜದ ಕುಟುಂಬವೊಂದು ವಾಸವಾಗಿತ್ತು. ಈ ಕುಟುಂಬದಲ್ಲಿ ಜನಿಸಿದ ಗೊಲ್ಲಾಳನೆಂಬ ಭಕ್ತನಿಗೆ ಶಿವ ಪ್ರಸನ್ನನಾದ ಎಂಬ ಕಥೆ ಕೇಳಿಬರುತ್ತದೆ. ನಂತರ ಇಲ್ಲಿ ಶಿವ ಹಾಗೂ ಭಕ್ತನೇ ದೈವವಾಗಿ ಗೊಲ್ಲಾಳೇಶ್ವರ ಎಂಬ ನಾಮದಿಂದ ಶಿವಭಕ್ತ ಪರಂಪರೆ ಬೆಳೆದುಬಂದದ್ದು ಇತಿಹಾಸ.
ಢವಳಾರ ಗ್ರಾಮದ ಬಲ್ಲುಗ ದುಗ್ಗಳಾದೇವಿ ಎಂಬ ಕುರುಬ ಕುಟುಂಬದಲ್ಲಿ ಜನಿಸಿದ ಗೊಲ್ಲಾಳ ಕುಲವೃತ್ತಿಯಂತೆ ಕುರಿ ಕಾಯುತ್ತಿದ್ದ. ಸದಾ ಶಿವ ಧ್ಯಾನ ನಡೆಸುತ್ತಿದ್ದ ಈತ ಶಿವಲಿಂಗವೇ ಸಾಕ್ಷಾತ್‌ ಶಿವ ಎಂದು ನಂಬಿದ್ದ.
ಪ್ರತಿ ವರ್ಷ ಚೈತ್ರಮಾಸದಲ್ಲಿ ಶ್ರೀಶೈಲ ಮಲ್ಲಿಕಾರ್ಜುನ ಜ್ಯೋತಿರ್ಲಿಂಗ ದರ್ಶನಕ್ಕಾಗಿ ಪಾದಯಾತ್ರೆ ಮೂಲಕ ತೆರಳುತ್ತಿದ್ದ ಭಕ್ತರು ಹಾಗೂ ಕಂಬಿ ಸ್ವಾಮಿಗಳನ್ನು ಕಂಡು ಭಾವುಕನಾದ ಗೊಲ್ಲಾಳನು ನಂದಯ್ಯನೆಂಬ ಸ್ವಾಮಿಗಳನ್ನು ಕಂಡು ತನ್ನ ಬಳಿ ಇದ್ದ ಹೊನ್ನಿನ ನಾಣ್ಯ ನೀಡಿ ಶ್ರೀಶೈಲದಿಂದ ಬರುವಾಗ ಶಿವಲಿಂಗ ತರುವಂತೆ ಕೇಳಿಕೊಂಡ.
ನಂದಯ್ಯ ಸ್ವಾಮಿಗಳು ಆಗಲಿ ಎಂದು ಶ್ರೀಶೈಲಕ್ಕೆ ತೆರಳಿ ದರ್ಶನ ಪಡೆದು ಗೋಲಗೇರಿ ಗ್ರಾಮದ ಬಳಿ ಬಂದಾಗ ಶಿವಲಿಂಗ ತರುವಂತೆ ಗೊಲ್ಲಾಳ ಹೇಳಿದ ಮಾತು ನೆನಪಾಯಿತು. ಆದರೆ ಅವರು ಲಿಂಗ ತಂದಿರಲಿಲ್ಲ. ಪಕ್ಕದಲ್ಲೇ ಬಿದ್ದಿದ್ದ ಕುರಿ ಹಿಕ್ಕಿ ತೆಗೆದುಕೊಂಡು 'ಇದು ಸಾಕ್ಷಾತ್‌ ಶಿವಲಿಂಗ' ಎಂದು ಗೊಲ್ಲಾಳನ ಕೈಗೆ ನೀಡಿ ಅಷ್ಟಾವರಣ ಪೂಜೆ ವಿಧಿ ಬೋಧಿಸಿ ಮುಂದೆ ತೆರಳುತ್ತಾರೆ.
ಇತ್ತ ಗೊಲ್ಲಾಳರು ನಂದಯ್ಯ ಸ್ವಾಮಿಗಳ ಮಾತು ನಂಬಿ ನಿತ್ಯ ಆ ಹಿಕ್ಕಿಗೆ ಹಾಲು, ಮೊಸರು ಸೇರಿದಂತೆ ಪಂಚಾಮೃತಗಳಿಂದ ಅಷ್ಟಾವರಣ ಪೂಜೆ ಕೈಗೊಂಡು ಶಿವನಾಮ ಜಪ, ಧ್ಯಾನ ಕೈಗೊಳ್ಳುತ್ತಾರೆ. ಹಸಿವು, ನೀರಡಿಕೆಯನ್ನೂ ಲೆಕ್ಕಿಸದೆ ಧ್ಯಾನ ಕೈಗೊಳ್ಳುತ್ತಿದ್ದ ಗೊಲ್ಲಾಳರನ್ನು ಕಂಡ ತಂದೆ ಬಲ್ಲುಗ ಕೋಪಗೊಳ್ಳುತ್ತಾರೆ. ಗೊಬ್ಬರದ ಗುಂಡಿಯಲ್ಲಿ ಗೊಲ್ಲಾಳ ಪ್ರತಿಷ್ಠಾಪಿಸಿದ್ದ ಹಿಕ್ಕೆ(ಲಿಂಗ) ಹಾಗೂ ಗೊಬ್ಬರದ ಗುಂಡಿಯನ್ನು ಚೆಲ್ಲಾಪಿಲ್ಲಿಯಾಗಿಸುತ್ತಾರೆ.
ಇದರಿಂದ ಕೋಪಗೊಂಡ ಗೊಲ್ಲಾಳ ತಂದೆಯೆಂಬ ಮೋಹವನ್ನೂ ತೊರೆದು ಅವರ ಶಿರಚ್ಛೇದನ ಮಾಡುತ್ತಾನೆ. ಆಗ ಗೊಬ್ಬರದ ಗುಂಡಿಯಲ್ಲಿದ್ದ ಕುರಿ ಹಿಕ್ಕಿಯಿಂದ ಶಿವಲಿಂಗ ಉದ್ಭವಿಸುತ್ತದೆ. ಶಿವ ಪ್ರತ್ಯಕ್ಷ್ಯನಾಗಿ ಭಲೇ ಗೊಲ್ಲಾಳ, ನಾನೇ ನೀನಾಗಿ, ನೀನೇ ನಾನಾಗಿ ಇಲ್ಲಿಯೇ ಲಿಂಗರೂಪದಲ್ಲಿ ನೆಲೆಗೊಳ್ಳುವೆ. ಮುಂದೆ ಈ ಸ್ಥಳ ಗೊಲ್ಲಾಳೇಶ್ವರ ಎಂಬ ಖ್ಯಾತಿಯಿಂದ ಭೂಕೈಲಾಸವಾಗಲಿ, ಭಕ್ತಿ, ನಿಷ್ಠೆ, ಅಚಲ ನಂಬಿಕೆಗಳೇ ಈ ಕ್ಷೇತ್ರದ ಹಿರಿಮೆಯಾಗಲಿ ಎಂದು ಹರಸಿ ಲಿಂಗದಲ್ಲಿ ಲೀನನಾದ ಎಂಬುದು ಪುರಾಣದಿಂದ ತಿಳಿದುಬರುತ್ತದೆ. ಈ ಕ್ಷೇತ್ರಕ್ಕೆ ಇಂದಿಗೂ ಅಪಾರ ಭಕ್ತರು ನಡೆದುಕೊಳ್ಳುತ್ತಾರೆ.
#ಕುರುಬರು_ಪೇಜ್
Comments
Post a Comment